Ngano diay ug wala’y source of income ang usa ka housewife? Mugamay ba ang iyang bili sa kinabuhi?
“Ug housewife, ingnon nga mangita ug trabaho. Ug naa’y trabaho, ingnon na maghousewife para magbantay sa mga anak.” Unsa man jud?
Nganong big deal man sa mga tawo nga ‘housewife’ ang usa ka babaye? Nganong pugson man jud na dapat unahon ang trabaho kay aron ‘mafeeling satisfied o malipayon’ daw sa kinabuhi?
Karon nga nagpost nako permi sa Facebook, sige rako ug makabasa ug mga comments nga, “Unsa’y work nimu diha? Naa raka sa balay? Wala ka’y plano magtrabaho? Sayang imung kurso kay wala ka nagtrabaho. Pagtrabaho uy ayaw paghousewife.”
Ang Pagpangdiscriminate
Atong college pako, naa pud ko’y gusto na magtrabaho jud sa kurso na akong gihuman. Ang usa ka rason ani kay daghan kaayong mga tawo ang mangdiscriminate ug dili imung kurso ang imung trabaho. Muingon dayon na, ‘Nakahuman man to siya ug maestra pero gacall center RA.’ O kaha ‘Nursing man to siya pero gacaregiver RA sa gawas.’ O kaha ‘Nakahuman man to siya ug college pero namaligya RA ug ukay-ukay.’
Tungod aning mga ing-aning comments, makapressure jud na mangita ug trabaho sa kurso na imung nahuman. Kay kung dili, ubos ang paglantaw sa mga tawo sa imua. Maskin gamay gud ug sweldo basta mao imung kurso, dako na ug panglantaw ang mga tawo.
Ang pangutana, nganong ing-ani man kacritical mangcomment ang mga tawo na maskin trabaho hilabtan pajud?
Atong bag-o lang mi nagminyo sa akong Indianong bana, kabalo najud ko na sa balay rajud ko sa duha ka tuig. Naa’y balaod diri sa India na kung maminyo ka ug Indiano, bawal ka mangapply ug trabaho sa sulod sa duha ka tuig. Tungod ato nakadecide ko na mag-upload ug mga videos. Kay naa raman ko sa balay, ipangvlog nalang nako ang mga panghitabo sa akong kinabuhi. Usa sad ni sa paagi na maupdate ang akoang pamilya sa Pilipinas.
Ang Lingaw sa “Wala’y Trabaho.”
Para sa akoa, okay ra kaayo ni. Wala rajud kaayo ko nabored kay busy jud kaayo ko ug edit ug videos ug atiman sa balay ug himo sa mga buluhaton sa balay. Nalipay gani ko atong una nakong sweldo sa Youtube kay nakakwarta ra sad ko sa akong gikalingawan ug gihagoan.
Naa’y mga panahon nga makaingon ko na nindot sad naa’y trabaho. Ang gusto nakong trabaho kay sa balay ra para wala’y gasto sa pamasahe ug dili sad jud ko hilig makig-atubang ug mga tawo. Pero kay nakasulay naman ko ug kasweldo sa social media, nakaingon ko na satisfied nako ani.
Nalipay ra biya ko sa akong sitwasyon nga naa rako sa balay. Apan karon nga nag-upload nasad ko sa Facebook, daghan kaayo ang magsige ug pangutana sa akoa ug unsa’y source of income daw nako?
Ngano diay ug wala’y source of income ang usa ka housewife? Mugamay ba ang iyang bili sa kinabuhi?
Ang pagkahousewife dili jud ni siya para sa tanan. Dili tanan mga asawa naa’y opportunity na mahimong housewife kay usahay dili jud paigo ang income sa bana maong ang mag-asawa ang mangita ug trabaho. Ug tungod kay nagtrabaho ang mag-asawa, mao ni ang panahon na mangita ug tigbantay sa mga anak. Lisud sad sa inahan na mahilayo sa iyang anak tungod kay kinahanglan siya magtrabaho. Naa sad uban na ganahan unta na sa balay lang para anaa jud sila magmatuto sa ilang mga anak. Pero kay kulang lage ang kwarta maong kinahanglan jud magtrabaho.
Anaa sad uban mga babae na pareha ug kahimtang sa akoa. Kanang paigo kaayo ang sweldo sa bana maong pwede mahimong housewife. Dili sad tanan babae ganahan sa “hustle” sa kinabuhi. Para sa akoa, dili jud ko komportable makig-atubang ug mga tawo permi. Mahurot akong energy ana. Makaluya kumbaga. Ganahan ko ug naa ra sa balay permi. Malipay sad ko maghimo ug mga buluhaton sa balay. Ganahan ko manghinlo, mang-arrange, manglaba, manghalay, manghugas ug plato, etc. Ug tungod kay kaya sa akong bana nga makakaon gihapon mi maskin naa rako sa balay, maong okay ra sad sa akoa nga housewife ko.
Ang Bag-ong mga Sources of Income Karong Panahona
Pero dili sad ni buot pasabot na komportable ko nga wala’y kwarta nga akoang hinagoan. Kay naa naman ta sa technological era, daghan na kaayo ug paagi nga makakwarta ta maskin naa ra ta sa balay. Ug usa ko sa mga naghago nga makakwarta sa social media. Ug sa pila ka tuig na pagpaningkamot, nakab-ot rajud nako ni. Nakasweldo najud ko finally sa social media. Dili man dako, pero nalipay na kaayo ko ani. Malipayon ko na maskin naa rako sa balay, naa gihapon ko’y sweldo nadawat.
Daghan ko ug makita na mga comments sa mga housewife na nag-ingon, “Ug housewife, ingnon nga mangita ug trabaho. Ug naa’y trabaho, ingnon na maghousewife para magbantay sa mga anak.” Unsa man jud?
Nganong daghan man jud kaayo ug magbuot nga housewife ang usa ka babae? Daog-daogon lage dayon ang mga babae kung nagpundo ra sa balay? Mawal-an nalang jud ba ug dungog ang usa ka babae kung housewife siya?Daghan jud kaayo ang nakaminus sa mga housewife.
Ang Ginikanan nga Anaa Permi
Kaniadtong bata pako, malipay jud kaayo ko na ang akoang inahan available jud siya permi. Kanang naa’y mga event sa among eskwelahan naa jud siya. Kung naa’y mga meeting present siya. Kung naa’y awarding naa jud siya. Malipay jud kaayo ko na sa tanang mga gibuhat nako sa eskwelahan na okay muattend ang mga ginikanan, naa jud ang akoang inahan. Makakita man gud ko sa uban nakong mga classmates sauna na di makaattend maskin kinsa sa ilang mga ginikanan kay busy ug trabaho. Maskin pobre mi ato sauna, nalipay jud ko na naa akong mga ginikanan permi.
I know karon lisud ang panahon ug kinahanglan jud nga naa ta’y kwarta sa panahon sa mga emergency. Pero nganong magproblema man mo sa kinabuhi sa usa ka housewife kung siya mismo wa siya nagproblema?
Dili tanan housewife naa’y chance na makakwarta sa social media o online na mga trabaho. Pero dili na siya buot pasabot na mangdaog-daog nalang ta ug mga housewife. Dako kaayo ug role ang mga housewife sa tibook panimalay. Sila ang nagmatuto sa ilang mga anak, nag-atiman sa ilang bana ug sa ilang kaugalingon. Ug kung dili nimu na maappreciate, imua na ng problema. Kay daghang mga housewife na satisfied sa ilang mga sitwasyon sa kinabuhi.
God bless sa inyong tanan.
