Mas gipili nila na muadto sa lugar na mas makafocus sila sa ilang kaugalingon kaysa magtan-aw sa uban.
Pero para sa akoa, mas nindot ang simple na kinabuhi kay wala kita nag-apas sa kung unsa’y uso sa palibot. Dili ta mapressure na musunod sa mga uso kay wala sad na siya sa atong interest. Nagfocus ra kita sa atong kaugalingon ug nalipay nata sa mga simple na butang na anaa nato. Kung kabalo man gud ta malipay sa mga simple na butang, buot pasabot ani na magkinaunsa man ang atoang kinabuhi, malipayon gihapon kita.
Kanunay ko makakita ug mga videos sa Youtube mahitungod sa simple na kinabuhi. Adunay mga tawo nga nangundang sa ilang mga trabaho nga dagko kaayo ug sweldo ug namalit ug balay para magpuyo sa bukid. Anaa sad uban nga nagpuyo sa sakyanan o school bus na gihimong balay ug magdrive sila bisan asa. O kaha ang uban nangundang sa trabaho ug nagtravel nalang dala lang ang gamay na butang.
Sa pagtan-aw nako niining mga videos makaingon ko na mura’g nindot ilang kinabuhi. Na kaniadto kaya unta nila maafford ang mga mahal na butang sama sa mahal na balay, sakyanan, sinina, sapatos, laptop ug cellphones pero gipili nila ang mas malinawon na kinabuhi nga layo sa syudad. Mas gipili nila na muadto sa lugar na mas makafocus sila sa ilang kaugalingon kaysa magtan-aw sa uban.
Ang uban niining mga nagpili ug simple na kinabuhi nag-ingon na mas peaceful ang ilaang pamuyo karon. Dili na sila mabalaka kaayo sa mga dagkong bayrunon sa panimalay. Kung dako man gud daw ta ug balay, mas dako ang bayrunon sa kuryente, ug tubig. Dako sad daw ug gasto sa pagfurnish sa balay. Buot pasabot ani nga mas dako ug maintenance kung mas dako ang balay.
Sa kanunay nakong tan-aw sa ing-ani na mga videos nakaingon ko na mura’g nindot tood ni siya na kinabuhi na gusto sad nako sa akong kaugalingon. Apan dili lang siya maapply sa tanang tawo.
Nagdako ko sa probinsya ug makaingon ko na simple rajud ang kinabuhi didto. Kaniadtong bata pako, inig wala ko’y lingaw, musaka ko sa mga kahoy ug maglingkod didto. Tan-awon nako ang mga dahon nga naglihok-lihok ug ang langit. Usahay musaka ko sa punuan sa lanzones ug magkaon didto sa taas sa punuan ug manglabay ug liso sa miyembro sa among pamilya na mulabay sa punuan. Usahay sad mamunlay ko o mananom (bisa’g dili gud mutubo tanan gitanom). Kung dili ko ganahan mugawas sa amoang balay, magbasa ko sa mga libro sa among eskwelahan ug dictionary kay wala man kaayo mi’y libro kaniadto. O kaha maminaw ko sa mga drama ug musika sa radio.
Halos tanan buluhaton sa probinsya manual. Kinahanglan ug tubig? Magsag-ob pa. Maligo ug maglaba? Magbomba pa sa puso. Magbubo sa mga bulak? Kinahanglan pa magsag-ob sa puso ug ibubo sa tanom. Grabe ang exercise ani sa pag-arsa sa baldi ug paglakaw padulong sa mga tanom. Ang silhigon sa palibot perting daghana kay dako man ang yuta sa palibot. Magluto ug pagkaon? Maghaling pa. Usahay dili pajud musiga ug nabasa ang mga kahoy sa ulan.
Inig maghuna-huna ko sa kasimple sa akong kinabuhi sauna, makaingon ko na naenjoy rajud nako ang akong kinabuhi sa pagkabata. Gusto sad unta ko na ing-ani kasimple akong kinabuhi karon. Apan kasagara sa simple, nagkalisud sad sa kinabuhi pinansyal.
Wala ko nag-expect na makaminyo ko ug foreigner. Naa ko’y idea sa akong gustong kinabuhi na gusto ko na mapuyo sad ug lain nga lugar. Pero wala ko nag-expect na matinood diay ni. Sa pagminyo nako ug foreigner, naabot ko sa syudad sa India ug lahi rajud ang kinabuhi sa syudad kaysa sa probinsya. Sayon nalang kaayo ang kinabuhi diri tungod sa ‘convenience’. Wala’y sud-an? Pwede na mag-order online ug muabot dayon pagkahuman sa 10 minutes to 30 minutes. Kapuyan magluto? Pwede na mag-order online o muadto sa duol na restaurant. Kapoy maggrocery? Pwede na mag-order ug grocery online ug ideliver na diretso sa inyoang balay. Maglaba? Naa’y washing machine. Dili na sad kinahanglan magsag-ob kay naa na’y direct na tubig. Kapoy maghinlo? Pwede na maghire ug tighinlo.
Sa bag-o palang ko diri sa India, nagsige ko ug hisgot sa akong bana na dili ko ganahan mupuyo sa syudad. Anaa sila’y balay na layo sa syudad ug didto ko gusto mupuyo. Apan dili pwede. Ang mga rason kay wala pako nahanas sa ilang lengwahe, dili pwede mabiyaan ang mga ginikanan sa akong bana ug daghan ug responsibilidad niadtong balaya na kinahanglan nakong makat-unan. Dili sad ni madali-dali ug kahitabo kung wala ko nakahibalo sa lengwahe diri. Ang akong gustong kinabuhi sa probinsya, wala jud intawon natuman.
Karon nga naa mi sa syudad, makita nako ang kinabuhi sa akong mga ugangan. Simple lang ang ilang lifestyle. Magyaka lang akong ugangan sa salog inig magkaon. Simple ra ang ilaang balay. Dili sila hilig magpalit ug mga gamit na wala sad pulos inig madugay. Simple ra ilang mga cellphone. Balik-balik ilang sinina ug mga tsinelas kay wala pa lage daw naguba. Ginagamit gihapon nila ang mga butang na karaan na kaayo kay lage wala paman naguba. Praktikal sila sa kinabuhi. Sige sila ug tigum ug ang mga importanti lang ang ilang paliton sama sa pagkaon, insurance ug pag-invest. Ang akoa sad bana pareha sa akong mga ugangan. Maskin naa man siya’y kwarta pero simple rajud siya sa iyang kaugalingon.
Sa pagtan-aw nako sa akong kinabuhi, nakarealise ko na pwede rapud diay na magpuyo sa syudad nga simple. Tinood na gusto ko ug kinabuhi pareha sa mga nakita nako sa Youtube, pero dili lang ni siya applicable sa amoang kinabuhi. Ug kay dili mani siya maapply sa akong kinabuhi, magbuhat nalang ko ug laing mga butang na makab-ot gihapon nako ang simple na kinabuhi sa kung asa man ko gibutang sa Ginoo.
Mas nindot ba ang simple na kinabuhi? Depende rajud sa tawo. Anaa’y mga tawo na malipayon na kaayo sa simple na mga butang. Anaa sad mga tawo na malipayon sa mahalon na mga butang. Pero para sa akoa, mas nindot ang simple na kinabuhi kay wala kita nag-apas sa kung unsa’y uso sa palibot. Dili ta mapressure na musunod sa mga uso kay wala sad na siya sa atong interest. Nagfocus ra kita sa atong kaugalingon ug nalipay nata sa mga simple na butang na anaa nato. Kung kabalo man gud ta malipay sa mga simple na butang, buot pasabot ani na magkinaunsa man ang atoang kinabuhi, malipayon gihapon kita.
Hinaot na magmalipayon kita sa kung unsa man ang anaa sa atoa. Bahala ug simple ang kinabuhi basta kamao ta muappreciate sa mga butang na anaa sa atoa.
God bless kaninyong tanan.
-Jane
