Blog

Ang akoang ‘good karma’ pagkahuman sa mga pagsulay.

Hello sa inyong tanan!

Mao ni akong unang bisaya na “blog”. Akoa ni siyang gitawag ug ‘PAMALANDONG’ kay mao jud ni ang sige nako gibuhat kung wala ko’y lingaw. Kanang maghuna-huna ko sa mga butang sa kinabuhi ug unsa ako narealise ug nakat-unan mahitungod ana. Welcome kaninyong tanan.

Wala ko sukad magshare mahitungod sa akoang palpak na mga relasyon kaniadto. Ang nakahibalo lang jud ani kay ang mga tao na dool sa akoa. Taas-taas jud siguro ni kay di man nako mapasabot sa inyoa kung di sad ninyo mahibaw-an ang sinugdanan sa istorya. Hinaot naa mo’y makat-unan.

Sinugdan

Ang kani nga storya sugdan nato atong 15 anyos pako. Naa ko sa simbahan namo aning panahona kay naa’y gipahigayon na Medical Mission. Ang kaning Medical Mission, ang panghitabo ani naa’y mga libre na check-up, tuli ug mga minor surgeries. Naa sad ipanghatag na mga tambal. Ming-attend ko niini kay aktibo man kaayo ko sa simbahan aning mga panahona ug nanginahanglan sad ang mga Medical Personnel ug extra nga tabang maong anaa ang mga batan-on didto.

Naa ko’y nakaila na usa ka foreigner na nursing tawagon nato ni siya’g si ‘Singer’. Gitudluan ko niya ug mga simple na mga butang pareha anang pagkuha ug BP ug blood sugar ug uban pa. Buotan siya, aktibo kaayo sa simbahan, mas tigulang pa sa akoa, ug Diyosnon sa akong panan-aw. Sa mubo na pagkastorya nagkauyab mi.

Ang Kalisud

High school pajud ko aning panahona. Mahal pa ang load kay ang P25 na unlitext, isa ra ka adlaw dayon ug naa’y mga unlicall mahal sad. Ayha mag-December 25 ug 31, magpaunli na kay di na makasend ug mensahe kay busy na ug greet ang mga tawo ug Merry Christmas ug Happy New Year. Uso pud ang mga check operator na di na makasend ug mensahe kay palabi ug text. Uso pa pud ang mga group sending ani. Sa mubo na pagkasulti, kinaraan kaayo kay keypad pajud ang cellphone aning panahona.

Makalingaw na mga panahon pero lisud sad magtext-text kay dungog kaayo ang piti-piti sa keyboard kada type. Inig magtawag, magcharge pa sa isa ka battery dayon ibutang ang extra battery sa cellphone. Usahay hulaton pa ug charge katong battery sa battery charger ayha makagamit napud sa cellphone. Lisud bitaw pero nakasugakod ang relasyon.

Ang Dakong Pagtulun-an

Mulaag si Singer sa amoang probinsya inig naa’y 1 week na wala’y klase. Ganahan akong mga ginikanan sa iyaa kay pareho mi ug relihiyon. Maayo muampo, maayo muwali, mukanta sa simbahan ug bisan unsa pa. Mananom sad ni siya sa among palibot, maayo mupatay ug halas gamit ang tsinelas ug maayo sad muluto. Abi jud nako ug kaning relasyona magdugay pero diri diay ko makakat-on ug dakong pagtulun-an sa akong kinabuhi.

Milabay ang pila ka tuig ug migraduate na si Singer ug nursing. Nag-eskwela diay siya sa Bukidnon maong dali ra siya makalaag sa amoa. Adtong migraduate siya, miadto mi sa akong mama ug pag-umangkon sa ilaang eskwelahan para muattend. Nagtutor pako ani ug Math para lang naa mi’y ikapamasahe dayon 12 ka oras among biyahe sa bus gikan sa Misamis Occidental. Perting layoa jud kaayo.

Ang mga Saad

Didto sa ilaang eskwelahan naila nako iyang mga magtutudlo, iyang mga kaila, iyaang igsoon, ig-agaw, ug parente. Daghan kaayo nakaadmire sa iyaa kay maayo siya muayo ug mga devices pareha anang cellphone ug laptop. But-an jud daw kono siya na pagkatao ug uban pa.

Pagkagraduate ni Singer miadto sila (Si Singer, iyang ig-agaw, igsoon, parente ug amigo) sa amoang dapit ayha sila milarga sa Manila pauli didto sa ilaang nasud. Ayha sila milakaw, nagpaampo pa mi sa usa ka pastor (na uncle ni Singer) na magdugay unta amoang relasyon ug mubalik si Singer para minyoan ko. Nahimo kibali siya ug mura’g engagement na kami ra na pamilya ang naa.

Ang PagKa-Loyal

Sa tibook namong relasyon ( 4 ka tuig ) makaingon jud ko na perti gyud nako ka-loyal. Naa’y mga event sa amo simbahan dayon naa’y mga batan-ong lalaki, di ko mukuyog. Ug naa’y mga batan-ong lalaki makigstorya nako, di ko mustorya ug ayo. Naglikay bitaw ko kay di ko ganahan maingnan na gabinuang. Maskin uyab-uyab ra tood na, mingtoo jud gihapon ko sa karma. Nakita man gud nako sa ako mga classmates kaniadto sa High School na kada-semana lahi-lahi ug uyab ug di ko ganahan ana. Maong permi ra ko sa amoang balay. Di sad ko hilig maglaag-laag pud noon.

Ang Pagsulay

Pag-abot ug isa ka tuig ni Singer sa ilaang nasud mikalit siya ug ingon sa akoa na paundangon daw ko niya ug eskwela ug Engineering. Gusto niya na muadto ko sa ilang nasud, magminyo mi, magpaburos ko dayon ug naa nami’y anak kay pwede ko mubalik sa pagskwela. Grabe jud among away ani kay nakaminus kaayo iyang tono sa akoa dayon di jud ko musugot na muundang ko ug eskwela.

Perti nakong paningkamot sa kalisud sa Engineering dayon undangon lang nako? Akong ginikanan grabe ang sakripisyo dayon magpaburos lang ko para malipay siya? Ingon pajud siya na ug di nako siya pilion, mangita siya ug lain kay dali ra daw siya makakita ug baye kay naa na siya trabaho ug sakyanan. Niadtong panahona naulit jud kaayo ko. Tungod ani, nakigbulag jud ko sa iyaa.

Ang mga Tambag

Pagbulag namo, nakigstorya ko sa ako mama ug alas doseng dako sa amoang duyanan. Di jud ko hilig magshare aning mga butanga pero nakaila man gud akoang inahan kay Singer kay nakaadto jud siya sa amoa. Giingnan nako akong inahan na nakigbulag ko kay Singer kay gusto niya na muundang ko’g skwela ug di ko musugot ani. Miingon ako siya na maayo akoang desisyon. Niining panahona kay bag-o lang gikasal si Toni Gonzaga sa iyang bana ug dugay jud kaayo to sila naghulat sa insaktong panahon. Miingon ako mama na muabot ra lage ang insaktong panahon para sa akoa pareha kang Toni.

Ang Kamatuoran

Naa’y usa ka Pinay na nagpuyo sa nasud nilang Singer. Pareha sila ug simbahan didto ug michat siya sa akoang messenger. Miingon siya na di na daw ko dapat magdahom na magbalik mi kay minyo na si Singer. Nakuratan ko niini. Nakaingon ko na mao diay na gusto niya na makigminyo na diretso kay naa na diay siya’y reserba sa ilang nasud. Samtang nangstalk sad ko sa Facebook nakaplagan nako iyaang sekretong account ug didto nako nakita ang mga pictures ni Singer ug sa usa ka babae na iyaang gipang-upload isa ka tuig na ang milabay. Pagkahuman ug isa ka bulan, giminyoan niya tung babae nga 16 anyos palang.

Ang Sipyat na Huna-huna

Kaniadto nakaingon ko na abi nako na magkadayon gayud mi ni Singer kay pareha mi ug relihiyon. Nakaingon ko na ug pareha mi ug Ginoo na gituhuan, mas hugot among relasyon kay mahadlok mi makasala. Nagtoo sad ko na ang tanan mga relihiyoso di makahimo ug mga ing-ani kay naa man Ginoo na nagtan-aw. Gina-encourage sad sa amo simbahan na magminyo ug kapareha ug relihiyon para malipayon ang pamuyo.

Ang Ikaduha

Ang ikaduha nako na ex tawgon nato siya ug Brent, Amerikano ni siya. Nameet nako to siya sa usa ka poetry app sad. Wala kaayo ko’y maistorya ani niya kay wa man sad mi nagkita. Si Brent Diyosnon, memorise and Bibliya, maayo musulat ug tula, mutuu ug mga kalag ug obsess sa end of the world. Duha ka tuig mi niya na nagkauyab. Nakigbulag ko kay tapulan kaayo siya mutrabaho dayon di na daw kono mi kinahanglan magkita kay mga isa ka tuig nalang daw matapos na ang kalibutan. Kani nga panghitabo 6 ka tuig na ang milabay.

Makaingon ko na grabe sad ako naagian. Basin sa inyoa okay ra ni nga sugilanon pero para sa akoa grabe najud ni. Gibinuangan ug wa gihatagan ug importansya. Nakapangutana ko ato sa ako kaugalingon ug aha ko nagkulang? Loyal man ko. Gihatagan man jud nako sila ug panahon maskin busy ko sa pagskwela. Nagbilar-bilar pako kay lahi-lahi ug oras. Nag-ampo sad ko permi na panalanginan ang relasyon para magdugay. Nakaingon ko na mao na gyud siguro ni ako kinabuhi. Na wa najud maayo mahitabo. Basin deserve nako to. Pero nagtry rajud ko ug huna-huna ug positibo, move-on ug higugma sa akong kaugalingon.

Ang Wala Damha

Kaniadto wala ko’y plano na mangita ug uyab kay gikapoy nako ug sakripisyo ug panahon dayon kwarta para load. Nakaingon ko na magfocus nalang ko’s ako pagskwela ug sa ako kaugalingon.

Nagsige nalang jud ko’g sulat ug mga ‘bitter’ na mga balak o tula sa mga poetry na apps kay tungod sa akong mga naagian. Ug sa wala damha, miabot si PJ. Wala ko’y giexpect sa among panagstoryahanay kaniadto pero siya diay ang mahimong ‘balangaw’ ug ‘good karma’ sa akong kinabuhi.

Ang Mga Nahitabo na Handum

Sa panag-uyab namo ni PJ (hangtud sa among pagmeet ug pagminyo) diri ko nakarealise na ang tanan akong gihandom na unta mahitabo sa akoa ug maexperience nako, siya ang nagtuman niining tanan. Di ko magshare sa akong mga gusto niyang buhaton sa akoa, pero siya ang nagvolunteer na magbuhat niini.

Didto ko nakarealise na naa diay ing-aning lalaki sa kalibutan! Kanang muupdate lang ug kalit kung aha siya mupadulong. Muchat ug kumusta nako o unsa ako gibuhat. Siya ang mag-initiate na manawag. Maskin busy kaayo sa kinabuhi, di jud mawala ang good morning ug good night. Magbilar ming duha ug tawag. Ug masuko siya, mangutana pa siya ug kumusta nako? Wala raba siya nakaistorya ug sakit na mga pulong? Ug kung naa man mangayo ug pasaylo.

Atong natumbahan ug kahoy ang linya sa kurente sa among dapit ug pila ka adlaw ko wala ka chat sa iyaa, misabot rajud kaayo siya. Iencourage ko niya na magtoon o magfocus sa ako pageskwela ug pagtrabaho. Hatagan ko niya ug oras na magbasa (kay hilig ko magbasa) ug pila ka oras kay exciting kaayo ang libro ako ginabasa.

Ang mga Efforts

Dayon pila palang kasemana ang milabay sa among relasyon, nagbook na siya ug ticket para magkita mi. Gusto najud siya makigkita sa akoa. Adtong nagkita mi, gunitan jud niya akong kamot inig maglakaw mi. Ipadaplin jud ko niya sa dalan para ug naa’y mahitabo siya ang masakitan dili ako. Gusto siya na mukaon ko ug ayo kay di siya ganahan na magutman ko. Gihatagan ko niya ug kindle para makabasa ko ug daghan ug siya na mangita sa libro ako gusto basahon.

Naningkamot jud siya ug drive ug layo para mas daghan ko’g makita sa Bohol kay wala pako kaadto didto sukad atong naglaag mi. Dako kaayo siya ug pasensya inig masuko o maulit ko. Hilig kaayo siya mulambing sa akoa. Mature ug panghuna-huna sa kinabuhi. Dili gastador. Permi ako’y priority. Mapinanggaon sa akoang pamilya. Maskin minyo nami karon, mao gihapon ni iyang batasan! Doble-doble ang kamaayo na nahitabo sa akoa!

Ang Kinaulahian

Nakaingon ko’g salamat Ginoo! Kung wala nako naexperience ang mga sakit sa kinabuhi, di sad nako maappreciate ang kanindot sa kinabuhi. Unom ka tuig ko naghulat ayha ko nakadawat sa akong ‘good karma’. Kung mibalos siguro ko ug dautan sa laing tawo mas dugay pa siguro akong hulaton o basin puro bagyo nalang siguro ang muabot sa akong kinabuhi. Kabalo ko nga dili perpekto ang kinabuhi pero grabe ang grasya ug kamaayo ang akong nadawat.

I hope na sa atong kinabuhi, anaa ta’y dakong pailob sa mga bagyo na atong gisagubang. Makaingon ta na mura’g puro raman bagyo ang naa sa atong kinabuhi! Magfocus lang jud ta sa atong kaugalingon na sa umalabot, muabot ra sad ang ‘good karma’ sa atoa kay nagpailob jud ta ug nagpabilin jud ta na maayong tawo. Maningkamot lang jud ta hangtud madaog nato atong mga pagsulay. Pareha sa ilaang giingon na inig human sa bagyo, naa jud balangaw.

God bless sa inyong tanan.