Blog

Naa jud mga panahon sa atong kinabuhi na maluya ta. Kabalo ko naa muingon sa inyoa na, ‘Salig lang sa Ginoo. Iampo lang na sa Ginoo.’ Kahibalo naman ta ana. Usahay man gud ang pag-ampo dili diha-diha dayon tubagon. Naa jud panahon na kinahanglan ta maghulat para siguro mafigure-out nato kung unsa atong mabuhat para maarang-arang atong sitwasyon. Kinahanglan sad ta mulihok para matabangan ta.

Ang Kagahapon

Atong naa pako sa Kolehiyo, maluya ko usahay sa kadaghang buluhaton sa eskwelahan. Daghan kaayo ug tun-anan ug usahay perti na nimung toon pero di gihapon insakto para makagrado ug mas taas. Makaingon ko na perti kalisud mag-engineering. Grabe kalabad sa ulo. Pero nakaya nako kay naa ko’y mga classmate na pareha sad nako ug sitwasyon. Nagtimbayayong mi sa among kalisud na gisagubang. Ug nindot sa pamati nga naa’y nakasabot sa imung gibati.

Ang mga Handom

Nakaingon ko sauna na basin inig makagraduate nako ug makatrabaho, di na siguro ko maluya sa akong kinabuhi. Pero mao ra gihapon ang panghitabo. Paggraduate nako, naa nasad ko’y handom na ing-ani unta mahitabo sa akoang kinabuhi. O kaha makakuha unta ko’g ing-ani nga trabaho aning kompanyaha. Inig di nato makab-ot ang mga butang na gusto unta nato mahitabo, usahay mawal-an jud ta ug gana sa kinabuhi.

Katong nailhan nako si PJ nakaingon ko na di najud ko maluya ani sa kinabuhi kay mag-uban najud mi ug makaexperience najud ko ug mga bag-ong mga butang. Tinood nga naa kalipay sa kinabuhi pero di jud malikayan nga naa’y mga panahon na maluya ta.

Nganong maluya man jud ta usahay sa atong kinabuhi?

1. Usa ka rason ani ang balik-balik natong buluhaton sa matag-adlaw.

Naa ko’y nakit-an na usa ka video. Nag-ingon didto na ang makawala ug gana sa kinabuhi kay ang balik-balik na buluhaton. Pareha anang mga housewife. Inig mata, magdigamo dayon para sa pamilya. Hugas plato, maglimpyo sa balay, ug manglaba. Nakarelate ko ani kay housewife sad ko. Balik-balik rajud akong trabaho kada-adlaw ug usahay sumo kaayo na ing-ani ra atong ginabuhat permi.

2. Gusto nga naa’y exciting na buhaton.

Mao ni kasagara ang gihandom sa mga tawo karon kanang permi exciting ang kinabuhi. Usa ka rason jud ani ang social media. Daghan ang mga tawo nga sige ra ug laag so gusto sad sa mga nakakita na maglaag permi kay murag nindot sa pamati sige ra ug laag. O kaha naa’y mga nakita nga video na sige ra ug kaon sa gawas so gusto sad sa mga tawo na itry sad ning mga pagkaona. Naa sad uban na videos na makita nato na sige ra sila ug isurprise sa ilang mga uyab/bana maong gusto sad ta makaexperience ug ing-ani kay exciting kaayo.

3. Magkompara sa kinabuhi sa laing tawo

Kung makakita ta sa kinabuhi sa laing tawo ug ang unang reaksyon nato ang kasuya, mao ni ang makaluya sa kinabuhi. Wala’y tambal sa kasuya. Musamot pajud ni kung ang atong gusto buhaton sa tawong gikasuyaan nato ang makapasakit kanila. Miserable jud kaayo ang kinabuhi kung ing-ani atong panghuna-huna. Kinsa man nga kinabuhi ang malipayon kung permi ra magkompara sa kinabuhi sa laing tawo?

4. Ang Dako nga Expectation

Makaingon ko na usa jud ni sa makawala jud ug gana sa kinabuhi. Kung dako kaayo ta ug expectation sa atong mga bana o hinigugma madismaya jud ta. Kanang maghandom ta na unta magsurprise akong bana o mubuhat siya ug mga effort pareha anang makita nato sa internet. O kaha mag-expect ta na unta ing-ani ako makab-ot sa kinabuhi unya wala nato kini nakab-ot. Kung dako jud kaayo ta ug expectation, madismaya jud ta. Ang usa sa sekreto sa malipayon na kinabuhi ang gamay ug expectation. Kay kung magkinaunsa, satisfied ta sa mahitabo.

5. Gamay ta ug paglantaw sa atong kaugalingon

Kung magduha-duha ta na makaya ba nato ang usa ka butang, ang mahitabo ana kay di jud nato na makaya. Giunhan naman nato daan ang atong kaugalingon sa usa ka butang na kaya unta nato makab-ot. Ang mahitabo ani, maluya dayon ta na di nato kaya ang usa ka butang. Pero kinsa man hinungdan ani? Ang atoa rapud na kaugalingon.

Unsa man ang buhaton para di ta maluya sa kinabuhi?

Para sa ako isa rajud ang solusyon ani. I-upgrade ang huna-huna. Kung naa ta’y mas maayo nga panghuna-huna sa kinabuhi, mas maayo ang mahitabo sa atoa.

Akong Nakat-unan

1. Maluya ko usahay aning balik-balik ang buhatonon sa balay. Usahay mugawas mi sa park malipay nako. Pero mubalik napud sa balay para maghimo nasad sa buluhaton. Makaluya biya jud kay sumo ba. Mao ng malingaw ko maghimo ug videos sa Facebook ug Youtube. Pero usahay makakapoy sad ng sige ug upload permi. Ang akoa nalang jud ginabuhat ani kay mangita ug laing lingaw. Pareha anang magsulat o magbasa ug libro. O kaha maglaba magkinamot o maghinlo. Maenergetic ko basta manghinlo kay karon nga nagkatigulang nako, ganahan nako’g kahapsay sa panimalay. Inig human nako’g hinlo malipay dayon ko sa resulta sa akong nabuhat.
2. Kay taong bahay man kaayo ko halos tibook adlaw naa rajud ko sa balay. Apan naa jud mga times nga gusto ko mugawas ug maglaag. Mao ng magdate jud mi halos kada semana sa akong bana kay mabuang siguro ko ug di ko makalaag panalagsa! Nindot pud ng makakita ta ug laing lugar para marefresh sad atong huna-huna.
3. Kung magkatigulang jud ta, muabot jud ta sa time na gusto ta ug stable na kinabuhi. Nindot sad nga makalaag ta ug layo kay exciting. Pero naanad nako nga di jud kaayo exciting ang mga panghitabo sa akong kinabuhi. Usahay makapangutana si PJ na, ‘di ba boring ang kaminyoon?’ Sa tinood lang wala jud ko nabored sa among kaminyoon. Nabored lang ko sa pagpundo sa balay. Pero gitry nako nga malipay sa gamay’ng mga butang mao ng makaingon ko na naexciting akong kinabuhi tungod aning akong huna-huna. Kung magmalipayon jud ta sa gagmay’ng butang, nindot sa pamati ang kinabuhi magkinaunsa man.
4. Kaniadto, hilig ko magkumpara sa akong kinabuhi sa uban. Hangtud sa naminyo ko naa gihapon panahon na muingon ko na ing-ani unta akong kinabuhi. O ing-ani unta among balay, naa unta mi didto nga lugar, naa pud unta ko’y ing-ani nga butang. Bag-o lang jud ko nakaingon sa akong kaugalingon na satisfied ko sa among kinabuhi. Misamot ug ka simple akong mga gusto. Mas ganahan nako karon maghimo ug mga nindot na memories kaysa magpalit ug mga butang nga temporaryo ra ang kalipay. Nakaingon ko na salamat jud. Kay naabot ko aning punto na di ko magkompara sa akong kinabuhi sa uban, o wala ko’y dagkong gusto sa kinabuhi.
5. Sa katuigan nga nadungag sa akong kinabuhi, nagkagamay sad akong expectations. Katong bag-o lang mi naminyo ni PJ, daghan ko ug giexpect na iyang buhaton pero lisud mahitabo o wala nahitabo. Permi rako nadismaya ug stress jud ako bana tungod aning tag-as nako na expectations sa iyaa. Hangtud naabot ko sa punto na di nako magreklamo. Lipay nako sa kung unsa’y naa nako. Wala nako’y dagkong giexpect sa mga tawo. Tungod ani mas na peaceful akong huna-huna ug mas malipayon ko sa akong sitwasyon. Naa man gud ta’y mga marealise sa kinabuhi na makaingon ta nga gipanalanginan jud kaayo ta. Tungod kay sige nako ug huna-huna karon na blessed ko, mas nagmalipayon ko. Dili man kanunay ang kalipay pero at least mas daghan ang kalipay kaysa kagool.

Ang Sulbad

Kung maluya ta sa atong kinabuhi, wala najud laing makasulbad niini kundi ang atong kaugalingong panghuna-huna. Dako jud kaayo ug impact kung positibo ta. Naa man mga panahon na muabot ang mga negatibo, gakson lang nato na hangtud mahumpay kini. Balik dayon ta sa pagkapositibo inig kahuman. Di jud ta magdugay niining kalibutan ug wala ta nagfocus sa kamaayo nga nahitabo sa atoa.

Proud ko sa imua nga nagbasa nga hangtod karon, naningkamot jud gihapon ka sa kinabuhi. Unta kung maluya ka, makakita ka ug kusog nga mubarog na malig-on para mulaban gihapon. Ayaw undang. Padayon lang. Dili man perpekto ang kinabuhi ang importante, buhi ka. Naa ka’y chance na mausab imung kinabuhi o kung dili, ang imuang huna-huna. Para magmalipayon gihapon ka maskin unsa man nga sitwasyon anaa ka.

God bless kaninyong tanan.