Blog

Gikuha na Siya sa Ginoo, na Wala pa Nako Siya Nailhan Pag-ayo

Samtang namalandong ko sa akong sunod isulat, misulod ni siya sa ako huna-huna ug lami napud kaayo ihilak. Mao ni ang pinakasakit siguro na nahitabo sa akong kinabuhi. Dili kaayo nako ni idetalye para sa privacy niini nga higala. Basin lahion nako ang ubang panghitabo para mafit akong istorya sa akong gibati. Ug kaila mo sa ako gipasabot, ayaw na imention palihog lang.

Ang Sinugdan

Pag-abot nako sa India, wala jud ko’y higala! Si PJ rajud akong maingon nga higala diri pero bana man nako siya. Lahi rajud ng bana sa higala. Naa’y mga batan-on na mga parente silang PJ o kaha higala pud niya na iyang gipaila-ila sa akoa. Pero di man nako feel ilang vibes. Kabalo mo anang pagkakita ug pag-istorya palang nimu sa isa ka tawo mafeel na nimu na magkauyon jud mo? Wala ko nakafeel ana sukad sa mga gipaila-ila ni PJ sa akoa na pwede nakong mahigala. Okay rapud sa akoa kaysa naman magdali ko na makakita ug higala dayon mag-away na hinoon mi or naa’y mga di maayong mahitabo.

Ang Unang Higala

Kadugayan niini, nagmessage si Elena sa akoa sa Adele Vlogs ( Sa Youtube ug Facebook ) ug akoa siyang nasuod. Kanunay mi magchat katong naa pa siya diri sa India ( kay nabusy na siya atong pagburos niya ug katong naa na iyang anak na si Adu). Magshare mi sa among mga experience sa India na wala namo ginashare sa Youtube kaniadto. Siya ang unang higala nako diri. Ang problema kay layo kaayo mi. Bag-uhay lang jud mi nagkita (pagkahuman ug 2 ka tuig namong chat-chat) kay nakaanhi sila diri sa Delhi. Lahi rajud ng naa kay naamiga na kachat nimu sa dugay’ng panahon dayon pagmeet ninyo, nafeel na nimu na tinud-anay na ning pagkahigalaay kay nagkita na jud mo sa personal.

Ang Bag-ong Higala

Niining mga panahona, naa’y nagchat sa akoa sa Instagram. Nabantayan na nako ni siya na magcomment sa akong videos sa Youtube. Pareho man gud to iyang picture sa Youtube kanang magcomment siya ug sa iyang Instagram. Miingon siya na gusto jud siya makighigala nako kay pareha mi ug mga hilig. Ingon siya na ‘Kaibiganin mo ako please kasi gustong-gusto kita’. Mao tong miingon ko sa iyaa na sure! Halos pareha jud mi ug hilig tanan dayon pareha pajud mi ug edad! Nagpuyo sad diay ni siya sa laing dapit sa India. Pagchat namo nafeel najud nako na mahimo nako siyang suod na higala ani. Kanang higala ba na istoryahan nako’s akong mga kagool ug problema nga di mangjudge!

Ang Ingnan sa Problema

Halos kada-adlaw jud mi magchat. Usahay alas 2 na sa kadlawon sa India mata pa siya ug diha mi magchat. Nakahibalo ko’s istorya sa iyang kinabuhi kay detalyado kaayo siya magsugilon. Akoang ishare sa iyaa kung naa mi’y dakong away ni PJ kay mas una man siya naminyo so mas ‘Ate’ siya sa akoa sa kaminyoon. Magshare ko sa iya sa problema nako diri sa India ug maskin problema nako’s akong mga igsoon ug pamilya magshare sad ko sa iyaa. Best friend najud akong turing sa iyaa.

Ang Plano

Naa tu’y kas-a na nagplano mi muadto sa ilaang lugar. Perting layua sa ilang lugar sa amoa. Kanang maggasto pami ug dakong kantidad sa eroplano para magkita lang mi. Okay ra kay PJ na mugasto ug dako para lang malipay daw ko na makakita sa akong higala. Nindot man gud pud ilang lugar, kanang daghan sad ug kalaagan. Nagplano na unta mi ato na magbook ug ticket pero miingon siya na di sa daw kay naa sila’y gikabusyhan. Basin sunod tuig nalang daw mi magkita. Mao tong miingon ko sa iyaa na magchat lang siya ug pwede nami na makameet sa iyaa ug sa iyang bana kay magtake ug leave si PJ sa trabaho para makameet mi.

Ang Dakong Pagsulay

Pag-abot ug pila ka bulan, miabot ang dakong pagsulay sa ilaang kinabuhi. Naospital ang akoang higala. Wala na siya nakachat sa akoa pero kanunay ko nangutana ug kumusta na siya. Salamat sa Ginoo na okay ra siya ug miuli sa ilaang balay para magrecover. Dili na kaayo mi magchat ani kay nagpahulay paman siya gikan sa iyaang pagkaospital pero kanunay ko nangutana sa iyaa ug kumusta na siya.

Hangtod miabot ang panahon na isa ka bulan na wala paman gihapon siya nagreply sa akoa! Halos kada adlaw ko magmessage jud. Di lang kanunay kay basin maluya siya ug tan-aw na gasige nalang ko ug mensahe sa iyaa. Maong gapugong ko ug mensahe jud. Nagchat nako sa iyahang instagram, facebook, twitter, whatsapp. Tanan social media niya akong gimessage halos kada adlaw.

Ang Kabalaka

Nabalaka najud kaayo ko ug naunsa na kaha siya. Positibo ra gihapon ko na basin nagpahulay sa siya sa social media ug nagfocus sa iyaang pagrecover. Miingon rako’s ako kaugalingon na muchat ra lage to siya inig maokay na ang tanan.

Ang Kakulba

Pila na ka bulan ang milabay wala paman gihapon siya nakamensahe ug balik! Didto nako nakulbaan pag-ayo. Nagstalk nako sa iyang instagram, twitter ug whatsapp unya wala ma’y update. Ug nakahuna-huna ko na mangstalk najud sa iyaang Facebook. Nakatag didto ang mga suod niya ug nag-open ko sa ilaang Facebook ug nashock kaayo ko! Nagpost sila ug mga videos na kanang nanamilit na sa akong higala. Giopen nako ang mga videos ug mga pictures. Adunay mga comment sa last na mga posts sa akong higala na puro hilak ang emoji kay nganong namiya daw siya ug una.

Ang Pagpaniguro

Wala pako mireact ani pero grabe najud ang buto-buto sa akong dughan. Lalom na kaayo ko’g gininhawaan. Nagmessage jud ko sa isa sa iyang mga suod na wala jud nako namessage sukad. Nangutana ko ug unsa’y nahitabo ug didto nila giconfirm na pila ka bulan na ang milabay na nawala siya. Mao diay na wala na siya nakamensahe ug balik sa akoa, kay wala naman diay siya.

Ang Kasakit

Didto nako nagsugod ug hilak ug todo. Hilak na nawad-an ug pamilya. Tinood jud ng ingon nila na mura’g gikumot imung kasing-kasing sa kasakit. Kanang mura ka’g gitook sa kalisud iginhawa. Kanang mura ka’g nakuyapan kay nahurot ug kalit imung kusog. Sakit man diay kaayo ning naa kay usa ka tawo na gituring na suod kaayo na mura na’g pamilya, dayon wala pa gani mo nag-ila ug ayo, gikuha na siya sa Ginoo. Nalooy kaayo si PJ ug comfort sa akoa niining panahona kay grabe jud nakong hilak. Wala nako nakaluto aning adlawa, wala nako’y gana mulihok. Naa rako permi sa katre, maghinuktok dayon mukalit lang ug hilak.

Ang Mga Pagmahay

Daghan ko ug pagmahay ani jud. Apil si PJ nagmahay sad. Miingon siya na ‘maypa namugos ta na muadto didto sa ilaa para mameet nimu siya sa personal’. Pero unsaon naman ni run? Ulahi naman ang tanan.

Samtang nagchat ko sa iyahang mga suod, didto nako nahibaw-an na kada-adlaw akoang higala na magtan-aw sa akong mga videos sa Youtube. Kada-adlaw paman ko mag-upload ato. Muingon daw siya na magkita ra daw kuno mi puhon. Samtang nagrecover siya, mutan-aw siya sa akong mga videos sa Youtube ug di na siya makacomment kay sa tv man siya mutan-aw.

Ang mga Wala Natuman na Plano

Misamot ko ug hilak ani. Nakadumdum ko sa iyaang gipangshare na mga plano niya sa kinabuhi. Daghan kaayo siya ug plano ug naappreciate nako ang iyang pagka-ambisyosa kay dako jud siya ug paglantaw sa kinabuhi. Nasakitan kaayo ko namalandong na di na niya matuman ang iyang mga handom. Kasayang ba sa mubo niya na panahon sa kalibutan! Sobra kasayang ba na wala nako siya nailhan pag-ayo! Kasayang ba na wala mi nagkita sa personal!

Ang Kasayang

Sukad nga nawala siya, ikapila jud ko makahuna-huna sa iyaa. Usahay maggutad ko ug mga utan madumduman nako siya kay hilig man siya magluto. Usahay magbuhat ko sa mga hilig nako na hilig sad niya madumduman napud nako siya. Kasayo niya nawala jud. Pareha pajud mi ug edad niya. Wala jud ko kasabot sa akong gibati kay gisayangan kaayo ko ug nagmahay jud ko na wala mi nagkita. Kanang nag-imagine ko sa iyaa unta na mahimong kinabuhi ug nasakitan kaayo ko para sa iyaa ug sa iyaang bana na daghan pa unta mga memories ilang mabuhat sa usa’g usa.

Ang Sakit nga Kamatayon

Daghan ko ug gi-imagine ani. Unsaon nalang ug mawala si PJ sa akong kinabuhi? Magsige nalang jud siguro ko ug hilak ani. Kanang naa ko’y adtoon na mga lugar na naadtoan namo, mukalit ra siguro ko ug hilak ug todo. Giimagine nako ang kasakit na nabatian sa bana sa ako higala ug grabe jud nakong hilak.

Kay di jud nako maimagine ug mawala akong bana sa akong kinabuhi. Mingawon jud ko sa amoang paghinigugmaay. Mingawon jud ko sa mga katawa, mga binuang, mga tam-is na mga moments, ug sa kalipay na akong nabati na kauban siya. Maghilak jud ko permi maghuna-huna ani ug si PJ magtambag sad sa akoa sa mga panahon na muabot unya ni. Mag-ampo lang jud ko sa Ginoo ani na hatagan ko niya ug kusog na malampusan nako kini ug kanus-a man gani ni maabot sa akong kinabuhi. Kay di jud nato kontrolado ang atong kinabuhi ug kinahanglan jud ta na ma-aware na muabot jud ning mga panahona.

Mao ni ako mga narealise mahitungod sa kinabuhi pagkawala sa ako higala.

1. Wala na’y mas dakong pagsulay sa kinabuhi kung ang hisgutan kay mahitungod sa kalawasan. Kung ang lawas na gani nato ang maningil, wala na’y pulos ang tanang butang kay ang atoa nalang handom ana na ma-okay atong panglawas.
2. Mubo ra kaayo ang kinabuhi. Kung mahimo, i-enjoy jud ug ayo kay wala ta kahibalo ug kanus-a ta mawala sa kalibutan.
3. Maningkamot lang jud ta na magmalipayon. Kay kung nalipay ta sa atong kinabuhi, kung kuhaon ta ug sayo, makaingon rata na okay ra kay gienjoy man nato ang atong kinabuhi sa kalisud man o sa kaharuhay.
4. Ampingan jud nato atong panglawas. Matod pa sa istorya na ‘Health is Wealth’. Dili jud ta makapaningkamot ug pangita ug kwarta o magkab-ot sa atong mga pangandoy kung naghigda nata sa katre kay nagdaot nata ug ayo.
5. Istoryaha imung mga mahal sa kinabuhi kay basin mao na ang ulahi nimung pag-istorya sa ilaa. Gaksa sila, ug ingna nga nahigugma ka sa ilaa aron kung magkinaunsa man sa kinabuhi, ang ulahi nimung nabuhat sa ilaa kay ang imung pagpakita sa imung gugma diha kanila.
6. Kung kaya nimu buhaton ang usa ka butang karon, buhata dayon. Ayaw hulata na magmahay ka na wala nimu kini nabuhat. Hilabina kung para kini sa imung mga hinigugma ug para sa imung mga gustong kab-uton sa kinabuhi.

Manghinaot ko na anaa kita’y kaisog na muatubang sa mga pagsulay sa atoang kinabuhi.

God bless sa inyong tanan.

P.S. Naghilak intawon ko ug 2 ka oras samtang nagsulat ko ani. Daghan ko’g mga pangutana ug mga pagmahay. Nakaingon ko’g makakita pa kaha ko ug higala na sama sa nawala sa akoa? Sakit pa gihapon kaayo para sa akoa.

Dili lang ni isa ka-adlaw nakong sinulat. Maskin nag-edit ko ani, naghilak gihapon ko. Kasakit ba sa kinabuhi kung mawal-an ta ug hinigugma. Stay strong lang jud ta tanan.